Nouvelles récréations et joyeux devis

Comparaison des Alquemistes à la bonne femme qui portoit une potee de laict au marché.

CHACUN sait que le commun lan- gage des Alquemistes est qu'ilz se pro- mettent un monde de richesses, & qu'ilz savent des secretz de nature, que tous les hommes ensemble ne savent pas: mais à la fin tout leur cas s'en va en fumee. Tellement que leur Alquemie se pourroit plus proprement dire art qui mine, ou art qui n'est mie. Et ne les sauroit on mieux comparer, qu'à une bonne femme qui portoit une potee de laict au marché, faisant son compte ainsi, qu'elle la vendroit deux liards: de ces deux liards el- le en achepteroit une douzaine d'oeufs: lesquelz elle mettroit couver, & en auroit une douzaine de pous- sins: ces poussins deviendroyent grands, & les feroit chaponner: ces chapons vaudroyent cinq solz la pie- ce, ce seroit un escu & plus: dont elle achepteroit deux cochons, masle & femelle, qui deviendroyent grands, & en feroyent une douzaine d'autres, qu'elle vendroit vingt solz la piece apres les avoir nourriz quelque temps: ce seroyent douze francs: dont elle achepteroit une ju- ment, qui porteroit un beau poulain. Lequel croistroit & deviendroit tant gentil. Il sauteroit, & feroit hin. Et en disant hin, la bonne femme, de l'aise qu'elle avoit en son[unclear] compte, se print à faire la ruade que feroit son poulain & en la faisant sa potee de laict va tomber, & se respandit toute. Et voilà ses oeufs, ses poussins, ses chapons, ses cochons, sa jument & son poulain tous par terre. Ainsi les Alquemistes, apres qu'ilz ont bien fournayé, charbonné, lutté, soufflé, distillé, calciné, congelé, fixé, liquefié, vitrefié, putrefié: il ne faut que casser un alembic pour le mettre au compte de la bon- ne femme.