Chrétien de Troyes

Puis que ma dame de Chanpaigne
Vialt que romans a feire anpraigne,
Je l’anprendrai mout volentiers,
Come cil qui est suens antiers
De quanqu’il puet el monde feire,
Sanz rien de losange avant treire.
Mes tex s’an poïst antremetre
Qui i volsist losenge metre,
Si deïst, et jel tesmoignasse,
Que ce est la dame qui passe
Totes celes qui sont vivanz,
Tant con les funs passe li vanz
Qui vante en mai ou en avril.
Par foi, je ne sui mie cil
Qui vuelle losangier sa dame ;
Dirai je : "Tant com une jame
Vaut de pelles et de sardines,
Vaut la Contesse de reïnes" ?
Naie, je n’en dirai ja rien,
S’est il voirs maleoit gré mien ;
Mes tant dirai je que mialz oevre
Ses comandemanz an cest oevre
Que sans ne painne que g’i mete.
Del chevalier de la charrete
Comance Crestïens son livre ;
Matiere et san li done et livre
La Contesse, et il s’antremet
De panser, si que rien n’i met
Fors sa painne et s’antancion.
Et dit qu’à une Acenssion
Li rois Artus et tenu ot
Riebe et belle tant com lui pot,
Si riche com au jor estut.
Aprés mangier ne se remut
Li rois d’antre ses conpaignons ;
Moult ot en la sale barons,
Et s’i fu la reïne ensanble ;
Si ot avoec li, ce me sanble, Mainte bele dame cortoise,
Bien parlant an lengue françoise ;
Et Kex qui ot servi as tables
Manjoit avoec les conestables.
La ou Kex seoit au mangier,
A tant ez vos un chevalier
Qui vint a cort molt acesmez,
De totes ses armes armez.
Li chevaliers a tel conroi
S’an vint jusque devant le roi
La ou antre ses barons sist,
Nel salua pas, einz li dist :
"Rois Artus, j’ai en ma prison
De ta terre et de ta maison
Chevaliers, dames et puceles,
Mes ne t’an di pas les noveles
Por ce que jes te vuelle randre ;
Ençois te voel dire et aprandre
Que tu n’as force ne avoir