Collectif

La menuise est el premier front ;
Les anguilles au brouet sont
Aprés a bataille rengie ;
Harens fres a la blanche aillie
Et tant de ces autres poissons
Vienent poingnant a esperons,
Et cil de loing et cil de prés
Tuit i vienent a grant eslés,
Mes nes vous sai pas toz nommer.
N'i remest poissons en la mer
Qui n'i viegne, vueille ou ne daingne.
Issu sont fors a la champaingne.
Et Charnage li posteïs
Mande la gent de son païs.
De l' esmereillon fist message
Qui le conta a loi de sage.
Ainz la quinsaine en i vint tant
A Charnage le combatant
De la gent de sa regïon,
Que ce n'est se merveille non.
Primes vindrent crasses porees
Et aprés vindrent charbonees ,
Char de porc a la vert savor
I vint por aidier son seignor ;
Et en aprés vienent li haste,
Coulon rosti et cuit en paste ,
Lardé de cerf au poivre noir
Et char de porc , par estavoir.