Chrétien de Troyes

Lors vint a la reïne et dit :
« Dame, por Deu et por le vostre Preu, vos requier, et por le nostre, Que le non a ce chevalier,
Por ce que il li doie eidier,
Me dites, se vos le savez.
— Tel chose requise m’avez, Dameisele, fet la reïne,
Ou ge n’antant nule haïne
Ne felenie se bien non.
Lanceloz del Lac a a non
Li chevaliers, mien esciant.
— Dex ! Com en ai lié et riant
Le cuer et sain », fet la pucele. Lors saut avant et si l’apele,
Si haut que toz li pueples l’ot,
A mout haute voiz : « Lancelot ! Trestorne toi et si esgarde
Qui est qui de toi se prant garde. » Qant Lanceloz s’oï nomer,
Ne mist gaires a lui torner ;