Etienne Jodelle

Sonnet

Si quelcun veut sçavoir qui me lie, et enflame,
Qui esclave a rendu ma franche liberté,
Et qui m'a asservi, c'est l'exquise beauté
D'une que jour et nuict j'invoque et je réclame :

C'est le Feu, c'est le Noeu, qui lie ainsi mon ame,
Qui embrase mon coeur, et le tient garotté
D'un lien si serré de ferme loyauté,
Qu'il ne sçaurait aimer ny servir autre Dame.

Voilà le Feu, le Noeu, qui me brusle et estraint :
Voilà ce qui si fort à aimer me contraint
Celle, à qui j'ay voüé amitié éternelle :

Telle que ny le temps ny la mort ne sçauroit
Consommer ny dissoudre un lien si estroit
De la saincte union de mon amour fidelle.