Jean Froissart

Je me mis en sa route et compagnie, et sur le chemin il me dit que l'évêque de Bayeux, le comte de Saint-Pol, Guillaume de Melun et messire Jean le Mercier étoient à Boulogne envoyés de par le roi de France et son conseil. Et d'autre part se tenoient à Calais, de par le roi Richard d'Angleterre, l'évêque de Durem, messire Guillaume de Montagu, le comte de Salsebrin, messire Guillaume de Beauchamp, capitaine de Calais, messire Jean Clanvou, messire Nicole de Grauvorth, chevaliers et chambellans du roi d'Angleterre, et messire Richard Rohale, clerc et docteur en lois. «Et se sont là tenus plus d'un mois, les uns à Boulogne, les autres à Calais, attendant ambassadeurs du royaume d'Escosse qui pas n'étoient venus n'a pas six jours, car mon cousin de Saint-Pol m'en a écrit ; et a le roi de France envoyé devers le roi d'Escosse et son conseil pourquoi il prît trèves ; car les Anglois ne veulent donner nulles trèves si les Escots ne sont enclos dedans.»