Luciano Rossi

p. 145 :
El dormir, vos di sanz mençonge
que la dame sonja un songe,
q'ele ert a un marchié annel.
Ainz n'oïstes parler de tel !
Ainz n'i ot tel estal ne bojon,
ne n'i ot loge ne maison,
changes, ne table, ne repair,
o l'an vandist ne gris ne vair,
toile de lin, ne draus de laine,
ne alun, ne bresil, ne graine,
ne autre avoir, ce li ert vis
fors solement coilles et viz.
Mais de cez i ot sanz raisons :
plaines estoient les maisons
et les chambres et li solier,
et tot jorz venoient colier
chargiez de viz de totes parz,
et a charretes et a charz.
Ja soit ce c'assez en i vient,
n'estoient mie por noiant,
ainz vendoit bien chascun lo suen.
Por trente saus l'avoit en buen,
et por vint saus et bel et gent.
Et si ot viz a povre gent :
un petit avoit en deduit
de dis saus, et de neuf et d'uit.
A detail vandent et en gros,
li plus chier et li miauz gardé.
La dame a par tot resgardé,
tant s'est traveilliee et penee
c'a un estal est asenee
qu'ele en vit un gros, un lonc,
si s'est apoiee selonc.
Gros fu darriere et gros par tot,
lo musel ot gros et estot.