Bibliothèque nationale de France

Tot autresi com l'aïmanz deçoit

I

Tot autresi com l'aïmanz deçoit
L'aguillete par force de vertu,
A ma dame tot le mont retenu
Qui sa biauté conoist et aperçoit,
Et je sui cil qui sor toz la covoit ;
Et se n'i truis ne merci ne raison
Par quoi puisse venir a garison,
Bien ait l'amors qui por mal ne recroit !

II

Si com l'arbres qui encontre le froit
Se tient de flors et de sa fueille nu
Ai je mon sens oblïé et perdu
Vers ma dame, quant plus mestier m'avroit.
Ahi, biaus Deus ! s'ele bien conoissoit
La grant amor, la bone entention
Dont li sospir vienent a tel foison,
Ja fins amis a joie ne faudroit.

III

Ne voudroie joïr de rien qui soit
Se ce par li ne m'estoit avenu,
Si com la lune a son veoir perdu,
Quant la clarté del soleil ne reçoit.
He, franche riens ! s'a nul jor avenoit
Qu'eüssiez ja ne merci ne pardon
D'ami verai loial sans traïson,
Por Deu, gardez al mains que ce seroit !

IV

A semblance d'ome qui adés boit
Ne ja nul jor n'avra assez beü,
M'a fait ma dame et ydropique et mu,
Que ne li os descovrir rien qui soit.
Quant plus l'esgart et je plus la covoit,
Et quant je n'os remirer sa façon
Li ueil del cuer remirent a bandon
Et pensent ce que nus hom ne verroit.

V

Tout autresi com de l'ombre qu'on voit
Que ce n'iert ja ne senti ne tenu,
M'a ma dame sans plaie el cors feru ;
Mais je ne sai dont ce vient ne que doit,
Fors d'un regart que je vi qu'ele avoit ;
Mais or le truis si cruël et felon
K'ainçois l'avroit cent mile foiz uns hom
Resgardee, qu'ele lui n'en avroit.

VI

Chançons, di moi a mon seignor Huon :
Si vain sohait et si espoir breton
M'ont deceü ; car ce est a bon droit.