Pontus de Tyard

ENIGME


SUBTILE suis, et de telle beauté,
Qu’autre beauté ne peut estre conneuë,
Que je n’y soye en une qualité.
   En liberté, je veux estre tenuë
Evidemment : car qui me veut contraindre,
Il perd et moy et l’object de sa veuë.
   S’il pense encor à ma substance atteindre,
Et me toucher, j’en pren telle vengeance
Que je luy donne assez dequoy se pleindre.
   Et l’œil du ciel en vain son influence
Coule çà bas, s’il ne se fait sensible
Des qualitez prinses de mon essence.
   Il est à l’homme à grand peine possible
Vivre sans moy : et si le fais dissoudre,
S’il est de moy entierement passible.
   Mon corps couvert d’une legere poudre
Ne me sçauroit avec soy arrester :
Car je le fuis plus vite que la foudre.
   Qui, tant sois peu, me veut solliciter,
Il me peut voir en colere incroyable
Les plus haut lieux en bas precipiter.
   Mobile suis, sans arret, variable,
Sans couleur, forme, ou certaine figure.
Et si suis veuë en ma force admirable.
   Je vis de faire à mon contraire injure,
Qui par sa mort m’apporte tel encombre,
Qu’en fin la moy-mesme j’en endure.
Or devinez si je suis corps ou ombre.