Samuel N. Rosenberg

Chanson d'amour attribuée à Gace Brulé

Oëz por quoi plaing et sopir,
Seignor, n'en fais pas a blasmer.
Touz jors m'estuet ma mort servir -
Amors ! n'en puis mon cuer oster ;
Mais honor ai d'ensinc morir,
Si en vuil bien les maus souffrir
Tant qu'a plus en puisse monter.

S'Amors me fait ses maus sentir,
Il ne m'en doit mie peser,
Qu'autres nou puet mais soustenir
Une hore sanz soi reposer,
Mais je suis amis sanz mentir.
Ja Deus ne m'en lait repentir,
Car en amant vuil bien finer.

Amors, tele hore fu jadis
Qu'estre me laissïez en pes ;
Mair or sui je verais amis,
N'autre riens ne m'agree mes.
Serai je donc de vos ocis ?
Nenil ! Trop avrïez mespris,
Quant je tout por vos servir les.

Cuers, qu'en puis mes se sui pensis,
Quant tu m'as chargié si grief fes ?
"Ha ! cors, de neant t'esbahis :
Ja n'ama onques hom mauvais.
Ser tant que tu aies conquis
Ce que plus desirres toz dis."
Voire, cuers, mes la morz m'est pres.

Gui de Pontiaus, en fort prison
Nos a mis Amors, sanz confort
Vers celes qui sanz achoison
Nos ocirront. Dont n'est ce tort ?
Oïl, car léaument amon ;
Ja ne nos en repentiron :
Bon amer fait jusqu'a la mort.

Gaçot define sa chançon.
Ha ! fins Pyramus, que feron ?
Vers Amors ne somes jor fort.