Philipp August Becker

Or vus dirrai de Miles l'adverser,
Ke fist Josian mal gre le sun esposer.
Mal gre le sun la mena a muster,
Mal gre le sun la fist la nuit cocher,
devant le list se sist, se prent a deschaucer,
forement se hast de Josian vergunder.
Josian le veist si comence a suspirer,
ele prent sa seynture de sey de oltre mer,
une lacete en fist solum son saver,
outre le col Miles si la prent a giter.


Seygnurs, ore entendés , ke vus ai ci dist !
Avant que Miles poit vener en son lit,
Josian la bele sa seynture prist,
Outre le col Miles le gita tot de fist.
Le lit fut haut ou il gist,
e li quens Miles de une part se sist,
e la pucele de altre part sailist,
a sey le tret e le col lui rumpist


E l'endemain kant aparust le jur
e de la clere aube apert la luur,
les chevalers se levent tuz en tur,
a la chambre venent ou estoit lur seynur,
hautement le apelent chevaler e contur,
pur nent le funt, car mort est sanz retur.