Zanmi Angle se yon liv ki gen pou objektif fè limyè sou kèk mo Kreyòl Ayisyen an ki soti nan lang Anglè. Yo rele mo sa yo Anglisis. Sa fè lontan yo ap antre nan lang nou, nan bouch nou, nan lavi n ak nan peyi n.
Tankou tout lang sou latè, Kreyòl la prete yon bann mo. Nou konnen twaka vokabilè nou soti nan Fransè, men lang nou an prete plizyè mo nan men lòt lang tankou Anglè ak Espanyòl. Nou ka menm di apre Franse, Angle se youn nan lang ki anrichi Kreyòl nou an plis.
Youn nan rezon ki fè sa se petèt paske Ayiti pa lwen Etazini. Yon lòt rezon tou se kapab akoz dyaspora ki Etazini an ki pa sèlman voye transfè men ki voye mo tou. Fòk nou pa bliye tou Okipasyon Ameriken 1915-1934 la ki te kite anpil mo Angle nan Kreyòl la. Anfen, Kreyòl la tankou tout lang sibi enfliyans Angle a ki se lang yon gran puisans mondyal ki se Etazini.
Jonel Juste se yon jounalis Ayisyen, yon ekriven, ak yon editè. Li se yon jounalis ki gen prèske 20 an karye, ki gen atik ki pibliye nan gwo jounal tankou The Miami Herald. Li pibliye, an franse, an kreyòl, ak an angle, anpil liv pwezi, istwa kout, ak resi tankou "Carrefour de Nuit", "Solèy, Solèy", "Mémoire de Quarantaine", "The Watch", " Joseph, Prince d'Egypte”, elatriye.