Par gemitu pulsuque labor versumque vicissim
mittitur in puppem remo mare. Laetus et ipse
Alcides "Quisnam hos vocat in certamina fluctus?"
dixit et intortis adsurgens arduus undis
percussit subito deceptum fragmine pectus
adque in terga ruens Talaum fortemque Eriboten
et longe tantae securum Amphiona molis
obruit inque tuo posuit caput, Iphite, transtro.
Dixit et arcano redolentem nectare rorem,
quem penes alta quies liquidique potentia somni,
detulit inque vagi libavit tempora nati.
Ille graves oculos et Hylan resonantia semper
ora ferens, ut nulla deum superare potestas,
procumbit. Tandem fessis pax reddita silvis
fluminaque et vacuis auditae montibus aurae.
Dat procul interea toto pater aequore signum
Phorcys et inmanes intorto murice phocas
contrahit antra petens; simul et Massylus et una
Lyctius et Calabris redit armentarius arvis.
Ilicet extremi nox litore solis Hiberas
condidit alta domos et sidera sustulit axis.
Flumina conticuere, jacet cum flatibus aequor.